Seventy-Two Easy Epigrams of Martial
- 1
- Petit Gemellus núptiás Marónillae
- et cupit et ínstat et precátur et dónat.
- Adeóne pulchra est? Immo foedius níl est.
- Quid ergo in illá petitur et placet? Tussit.
-
- 2
- Sunt bona, sunt quaedam mediocria, sunt mala plúra
- quae legis híc: aliter nón fit, Avíte, liber.
-
- 3
- Nón amo té, Sabidí, nec possum dícere quáré:
- hoc tantum possum dícere, non amo té.
-
- 4
- Quem recitás meus est, ó Fídentíne, libellus:
- sed male cum recitás, incipit esse tuus.
-
- 5
- Ámissum nón flet cum sóla est Gellia pátrem,
- sí quis adest iustae prósiliunt lacrimae.
- non lúget quisquis laudárí, Gellia, quaerit,
- ille dolet véré quí sine teste dolet.
-
- 6
- Núper erat medicus, nunc est vespillo Diaulus:
- quod vespillo facit, fécerat et medicus.
-
- 7
- Bella es, nóvimus, et puella, vérum est,
- et dívés, quis enim potest negáre?
- sed cum té nimium, Fabulla, laudás,
- nec dívés neque bella nec puella es.
-
- 8
- Ut recitem tibi nostra rogás epigrammata. Nóló.
- nón audíre, Celer, sed recitáre cupís.
-
- 9
- Nullus in urbe fuit tótá quí tangere vellet
- uxórem grátís, Caeciliáne, tuam,
- dum licuit: sed nunc positís custódibus ingéns
- turba futútórum est: ingeniósus homo es.
-
- 10
- Dímidium dónáre Linó quam crédere tótum
- quí mávolt, mávolt perdere dímidium.
-
- 11
- Sexte, nihil débés, níl débés, Sexte, fatémur.
- débet enim, sí quis solvere, Sexte, potest.
-
- 12
- Carmina Paulus emit, recitat sua carmina Paulus.
- nam quod emás possís iúre vocáre tuum.
-
- 13
- Quod querulum spírat, quod acerbum Naevia tussit,
- inque tuós mittit spúta subinde sinús,
- iam té rem factam, Bíthynice, crédis habére?
- Errás: blandítur Naevia, nón moritur.
-
- 14
- Uxórem nóló Telesínam dúcere: quáré?
- moecha est. sed puerís dat Telesína. voló.
-
- 15
- Pexátus pulchré rídés mea, Zóīle, tríta.
- sunt haec tríta quidem, Zóīle, sed mea sunt.
-
- 16
- Abscísá servum quid fígis, Pontice, linguá?
- nescís tú populum, quod tacet ille, loquí?
-
- 17
- 'Tháīda Quintus amat.' 'Quam Tháīda?' 'Tháīda luscam.'
- únum oculum Tháīs nón habet, ille duós.
-
- 18
- Versiculós in mé narrátur scríbere Cinna.
- Nón scríbit, cúius carmina némo legit.
-
- 19
- Auriculam Marió graviter míráris olére.
- Tú facis hoc: garrís, Nestor, in auriculam.
-
- 20
- Volt, non volt dare Galla mihí, nec dícere possum,
- quod volt et non volt, quid sibi Galla velit.
-
- 21
- Et voltú poteram tuó carére
- et colló manibusque crúribusque
- et mammís natibusque clúnibusque,
- et, né singula persequí labórem,
- tótá té poteram, Chloé, carére.
-
- 22
- Dé nulló quererís, nullí maledícis, Apící:
- rúmor ait linguae té tamen esse malae.
-
- 23
- Nullí, Tháī, negás, sed sí té nón pudet istud,
- hoc saltem pudeat, Tháī, negáre nihil.
-
- 24
- Galla, negá: satiátur amor nisi gaudia torquent:
- sed nólí nimium, Galla, negáre diu.
-
- 25
- Nullós esse deós, ináne caelum
- adfirmat Segius: probatque, quod sé
- factum, dum negat haec, videt beátum.
-
- 26
- Tú Sétína quidem semper vel Massica pónis,
- Pápyle, sed rúmor tam bona vína negat:
- díceris hác factus caelebs quater esse lagóná.
- Nec puto nec crédó, Pápyle, nec sitió.
-
- 27
- Nihil Ammiáno praeter áridam restem
- moriéns relíquit ultimís pater cérís.
- fierí putáret posse quis, Marullíne,
- ut Ammiánus mortuum patrem nóllet?
-
- 28
- Nós bibimus vitró, tú murrá, Pontice. Quáré?
- Pródat perspicuus né duo vína calix.
-
- 29
- Languébam: sed tú comitátus prótinus ad mé
- vénisti centum, Symmache, discipulís.
- centum mé tetigére manús Aquilóne gelátae:
- non habuí febrem, Symmache, nunc habeó.
-
- 30
- Tháīs habet nigrós, niveós Laecánia dentés.
- quae ratió est? émptós haec habet, illa suós.
-
- 31
- Saepe salútátus numquam prior ipse salútás:
- síc eris? Aeternum, Pontiliáne, valé.
-
- 32
- Quae légis causá nupsit tibi Laelia, Quinte,
- uxórem potes hanc dícere légitimam.
-
- 33
- Nón dónem tibi cur meós libellós
- órantí totiéns et exigentí
- mírárís, Theodóre? Magna causa est:
- dónés té mihi né tuós libellós.
-
- 34
- Semper pauper eris, sí pauper es, Aemiliáne.
- dantur opés nullís nunc nisi dívitibus.
-
- 35
- Insequeris, fugió; fugis, insequor; haec mihi mens est:
- velle tuum nóló, Dindyme, nolle voló.
-
- 36
- Uxórem, Charidéme, tuam scís ipse sinisque
- á medicó futuí: vís sine febre morí.
-
- 37
- Laudat, amat, cantat nostrós mea Róma libellós,
- méque sinús omnés, mé manus omnis habet.
- Ecce rubet quídam, pallet, stupet, oscitat, ódit.
- hoc volo: nunc nóbís carmina nostra placent.
-
- 38
- Cúr nón mitto meós tibi, Pontiliáne, libellós?
- Né mihi tú mittás, Pontiliáne, tuós.
-
- 39
- Aera domí nón sunt, superest hoc, Régule, sólum
- ut tua vendámus múnera: numquid emis?
-
- 40
- Nón cénat sine apró noster, Tite, Caeciliánus.
- bellum cónvívam Caeciliánus habet.
-
- 41
- Unguentum fuerat, quod onyx modo parva gerébat:
- olfécit postquam Pápylus, ecce, garum est.
-
- 42
- Omnia, Castor, emis: síc fíet ut omnia vendás.
-
- 43
- Mório dictus erat: vígintí mílibus émí.
- redde mihí nummós, Gargiliáne: sapit.
-
- 44
- Pauper vidérí Cinna vult; et est pauper.
-
- 45
- Múnera quí tibi dat locuplétí, Gaure, seníque,
- sí sapis et sentís, hoc tibi ait: 'Morere.'
-
- 46
- Cum sítis similés parésque vítá,
- uxor pessima, pessimus marítus,
- míror nón bene cónveníre vóbís.
-
- 47
- Mírárís veterés, Vacerra, sólós
- nec laudás nisi mortuós poetás.
- Ignoscás petimus, Vacerra: tantí
- nón est, ut placeam tibí, períre.
-
- 48
- Inscrípsit tumulís septem sceleráta virórum
- sé fécísse Chloé. Quid pote simplicius?
-
- 49
- Núbere vís Priscó: nón míror, Paula; sapistí.
- dúcere té nón vult Priscus: et ille sapit.
-
- 50
- Laudás balnea versibus trecentís
cénántis bene Ponticí, Sabelle.
- vís cénáre, Sabelle, nón lavárí.
-
- 51
- Sit tibi terra levis mollíque tegáris haréná,
- né tua nón possint éruere ossa canés.
-
- 52
- Tinctís múrice vestibus quod omní
- et nocte útitur et dié Philaenis,
- non est ambitiósa nec superba:
- délectátur odóre, nón colóre.
-
- 53
- Lector et audítor nostrós probat, Aule, libellós,
- sed quídam exáctós esse poéta negat.
- nón nimium cúró: nam cénae fercula nostrae
- málim convívís quam placuisse cocís.
-
- 54
- Lége nimis dúrá cónvívam scríbere versús
- cógis, Stella? 'Licet scríbere nempe malós.'
-
- 55
- Clínicus Héródés trullam subduxerat aegró:
- déprensus dixit 'Stulte, quid ergo bibis?'
-
- 56
- Núbere Paula cupit nóbís, ego dúcere Paulam
- nólo: anus est. Vellem, si magis esset anus.
-
- 57
- Mensás, Óle, bonás pónis, sed pónis opertás.
- Rídiculum est: possum síc ego habére bonás.
-
- 58
- Argentí libram mittébás; facta selibra est,
- sed piperis. Tantí nón emo, Sexte, piper.
-
- 59
- Múlio vígintí vénit modo mílibus, Aule.
- mírárís pretium tam grave? surdus erat.
-
- 60
- Lesbia sé iúrat grátís numquam esse futútam.
- Vérum est. Cum futuí vult, numeráre solet.
-
- 61
- Níl mihi dás vívus; dícis post fáta datúrum.
- Sí non es stultus, scís, Maro, quid cupiam.
-
- 62
- Mentítur quí té vitiósum, Zóīle, dícit.
- nón vitiósus homo es, Zóīle, sed vitium.
-
- 63
- úná nocte quater possum: sed quattuor annís
- sí possum, peream, té Telesilla semel.
-
- 64
- Tanta tibi est animí probitás órisque, Safróní,
- ut mírer fierí té potuísse patrem.
-
- 65
- Habet Áfricánus míliens, tamen captat.
- Fortúna multís dat nimis, satis nullí.
-
- 66
- Omnia prómittis cum tótá nocte bibístí;
- máne nihil praestás. Pollio, máne bibe.
-
- 67
- Quáré nón habeat, Fabulle, quaeris
- uxórem Themisón? Habet sorórem.
-
- 68
- Dentibus atque comís - nec té pudet - úteris émptís.
- quid faciés oculó, Laelia? nón emitur.
-
- 69
- Nón est, Tucca, satis quod es gulósus:
- et dící cupis et cupis vidérí.
-
- 70
- Difficilis facilis, iúcundus acerbus es ídem:
- nec técum possum vívere nec sine té.
-
- 71
- Hérédem tibi mé, Catulle, dícis.
- nón crédam, nisi légeró, Catulle.
-
- 72
- Né laudet dignós, laudat Callistratus omnés.
- cui malus est némó, quis bonus esse potest?